Rwanda: Abaturage bo mu karere ka Kayonza baratabaza kubera ko ubutegetsi bubarandurira imyaka bukanabatemera insina bwitwaje amaterasi

http://rwanda-in-liberation.blogvie.com

Abaturage bo mu karere ka Kayonza baratabaza kubera ko ubutegetsi bubarandurira imyaka bukanabatemera insina bwitwaje amaterasi

mars 6th, 2013 by rwanda-in-liberation

Hashize hafi ibyumweru bibiri abayobozi b'umurenge wa Kabare, akarere ka Kayonza mu ntara y'Uburasirazuba batangije icukurwa ry'amaterasi muri uwo murenge uturiya parike y'Akagera aho mu tugari  twa Gitare na Rubumba abayobozi ku nzego z'umurenge n'utugari bafatanyije n'ab'akarere batangije icukurwa ry'amaterasi maze si ukurandura imyaka bavayo ndetse n'intoki barazitema karahava ngo ntacyo abaturage bagomba kuvuga kuko ngo ni gahunda za leta.

Ubwo twamaraga kumenya iki kibazo twanyarukiye muri uwo murenge ariko tugera mu kagali ka Gitare mu mudugudu wa Gahonza taliki 3 Werurwe 2013 maze tuhasanga abantu benshi bamwe bapimaga abandi barandura amasaka ndetse abandi bacukura. Twabajije niba abarandurirwa imyaka bakanatemerwa intoki hari icyo bahabwa cyasimbura iyo myaka badusubiza ko ngo ntacyo babona kuko bababwiye ko ari gahunda za leta. Umuntu akaba yakwibaza iyo leta irandura imyaka abaturage bihingiye ngo ibatunge ndetse rimwe na rimwe bakaba baranayitanzeho amafaranga bikamuyobera.

Abaturage ariko banatubwiye ko ngo hari umukecuru utuye aho mu kagari ka Gitare ngo wanze ko bamurandurira amasaka ngo banamutemere urutoki dore ko twanabonye ko afite insina nyinshi binagaragara ko azikuramo umusaruro ufatika. Uwo mukecuru tutabashije kumenya amazina kuko abaturage batashatse kuyadutangariza ngo abacukura amaterasi bateye imambo mu mirima y'amasaka n'urutoki bashaka aho banyuza amaterasi maze abasaba kumuvira mu myaka ndetse ngo anabwira umuyobozi w'umurenge ko adashobora kwemera ko bamwangiriza imyaka ngo yayitanzeho amafaranga menshi. Yanongeyeho ngo keretse niba leta yabo ibikora ku ngufu ariko umuyobozi w'umurenge wa Kabare ngo asubiza ko badakoresha ingufu.

Ikibazo ngo cyarakomeye ku buryo abaturage bandi nabo ngo bavuze ko nabo batemera ko babarandurira imyaka maze umuyobozi w'umurenge ngo yegera uwo mukecuru amubwira ko niba yaratanze ibihumbi 200 ngo bayamuha ariko akemera ko barandura amasaka ye bakanatema urutoki ariko umukecuru ngo arabihakana. Ubwo ibintu bitangiye gukomera minisiteri y'ubuhinzi yamenye ikibazo maze yoherezayo intumwa taliki 4 Werurwe 2013 zijya kubwira abaturage ko ngo gahunda zizakorwa hatangijwe imyaka yabo.

Ku italiki 5 Werurwe 2013 ubwo twageragezaga kureba niba ibyavuzwe n'intumwa za minisiteri byaba byubahirijwe maze dusanga gucukura byakomeje ariko bitarimo imbaraga nk'izisanzwe bikaba bigaragara ko leta yaba igeze mu ihurizo ryo gushakisha inzira yanyuramo ngo irandure iyo myaka inateme intoki ku buryo byumvikana ko iki kibazo gishobora kuzabyara impaka nyinshi cyangwa kigasubikirwamo hagati n'ubwo ubu imwe mu mirima ubutaka babuteye hejuru bashakisha aho bazanyuza ayo materasi mu by'ukuri binagaragara ko uwo musozi acukurwaho atariwo akeneweho cyane kuko n'ubundi usanzwe uciye bugufi ku buryo umuntu yanahubaka ikibuga cy'umupira atagombye kwigizayo ubutaka bunini.

Turakomeza gukurikiranira hafi iby'iki kibazo tukazabagezaho uko ibintu byifashe ariko biragaragara ko leta ifite gahunda ndende yo gukenesha abaturage no kubateza inzara ibarandurira imyaka inabatemera intozi.

Muvunyi G.
Kayonza/Uburasirazuba 

Musabe ko inkoramaraso Kabandana afatirwa ibyemezo muri USA

Begin forwarded message:

From: Simeon <ijwiryarubanda@ijwiryarubanda.com>
Date: March 5, 2013, 6:48:11 PM EST
To: ijwiryarubanda@ijwiryarubanda.com
Subject: Musabe ko inkoramaraso Kabandana afatirwa ibyemezo muri USA
Reply-To: ijwiryarubanda@ijwiryarubanda.com

Komera.

Niba ushobora kumenyana n'abanyamerika, ushobora kubasaba gukora pression kuri Leta yabo na Congres yabo, bakabaza impamvu inkoramaraso Kabandana yemerewe kuba ku butaka bwabo. Kugira ngo batagira ngo ni ibihuha cyangwa amabwire adafite ishingiro, dore ibimenyetso bigaragara baheraho byatanzwe n'umubyeyi wari uhibereye igihe Kabandana n'abo bari kumwe bicaga abasenyeri i Gakurazo bakica n'umwana we w'imfura. Reba izi links ziriho ibaruwa yandikiye Secretary of State John Kerry n'ubuhamya bwuzuye bw'ibyo yiboneye ubwe igihe bicaga umwana we:

 

1. Letter written by Mrs Esperance Mukashema to US Secretary of State about Rwandan war criminal General Kabandana

 

2. Eyewitness Testimony by Esperance Mukashema on RPF army massacres at Gakurazo, Rwanda

 

Muhaguruke nyabuna, buri muntu ashyireho ake. Mugire akazi keza.

Umugoroba mwiza.

 

Simeon.

Ijwi Rya Rubanda.

 

- Ibiganiro Live: http://ijwiryarubanda.com
- Ibiganiro byahise: http://ijwiryarubanda.com/ibiganiro
========================

 

Mme Alice Muhirwa, Umubitsi wa FDU-INKINGI, yatanze ikiganiro ku ruhare rw'umunyarwandakizi muri demokarasi y'u Rwanda

URAHARE RW'UMUNYARWANDAKAZI MURI DEMOKARASI Y'U RWANDA

http://www.blogtalkradio.com/radioitahuka/2013/03/05/urahare-rwumunyarwandakazi-muli-demokarasi-yu-rwanda

Rwanda-Gisagara: abasirikari n’abapolisi bagose abaturage batatanze mitiweri

http://rwanda-in-liberation.blogvie.com/

Gisagara: mu rukerera rw'ejo kuwa mbere ku italiki 4 Werurwe 2013 abasirikari n'abapolisi ngo baragota abaturage batatanze mitiweri bayitange ku ngufu cyangwa bafungwe

mars 3rd, 2013 by rwanda-in-liberation

Amakuru dukesha bamwe mu bayobozi bo mu nzego zo muri aka Karere ka Gisagara ni uko ejo mugitondo taliki 4 Werurwe 2013 abapolisi n'abasirikari bazindukira kun go z'abaturage bakazigota usohotse bakamufata udasohotse bakaza kumusohora mu nzu bumaze gucya. Ibi byemezo bikaba byafatiwe mu nama yabereye mu murenge wa Nyanza uyu munsi taliki 3 Werurwe 2013 yari ihuje abayobozi batandukanye ku rwego rw'umurenge n'utugali hamwe n'inzego za polisi n'iza gisirikari bakaba barebye ibibazo by'imari bafite bagasanga nta handi bakura amafaranga yo kubikemura none ngo barazindukira mu baturage bayabake ku ngufu naho ubundi ngo umurenge ntiwashobora gukomeza gukora.

Bamwe mu bayobozi baduhaye aya makuru tukaba tudashobora kuvuga amazina yabo kubera impamvu z'umutekano wabo batubwiye ko iki cyemezo ngo ari uburyo bwa nyuma bafite bwo gushakisha amafaranga kugirango nibura bimwe mu bikorwa by'umurenge by'ibanze bidahagarara ariko ngo ntibizera neza ko hari icyo bazakuramo kandi ngo n'iyo bagira icyo babona muri uku kwezi ngo ntabwo bazi uburyo ukwezi gutaha byazagenda ariko ngo aho gupfa none wapfa ejo kandi ngo icyo gihe nihagera bazashaka indi mitwe bateka ku baturage bayabavanemo kugeza basohotse mu bibazo barimo bijyanye n'ibihano byabafatiwe.

Twabibutsa ko nanone Kumugoroba wo ku italiki ya 1 Werurwe 2013 umuyobozi w'akagali ka Higiro witwa Ndayishimiye Jean Baptiste, mu murenge wa Nyanza, akarere ka Gisagara, intara y'Amajyepfo yashyikirije abaturage benshi inzandiko zibahamagaza kwitaba ku biro by'akagali ka Higiro ngo icyo bahamagariwe bazakimenya bahageze. Mugitondo cyo ku italiki 2 Werurwe 2013 abahamagajwe baritabye maze bageze ku kagali barafungwa ngo kuko batatanze amafaranga ya mitiweri.

Ubwo abafunzwe baje gutegekwa gusinya impapuro zivuga igihe bazatangira ayo mafaranga ariko nk'uko bari benshi cyane hari n'abatazisinye kuko byageze aho bikaba nk'akavuyo kandi ababasinyishaga bakaba babonaga basa n'abata igihe kuko byagaragaraga ko gusinya byasaga no kwikiza ko n'ubundi abaturage ayo mafaranga bashobora kutazayatanga kuko n'ubundi nta n'ubushobozi bafite bwo kuyabona kandi ngo ubukene buranuma.

Abayobozi b'akagali bamaze kubona ko bakora ubusa maze ahagana mu masaa kumi n'ebyiri z'umugoroba abafashwe bararekurwa kuko icyari kigamijwe kwari ukubaka amafaranga ku ngufu ariko bisa n'ibyananiranye kuko bayabuze kubera ubukene bw'abaturage ntaho bashoboraga kuyakura. Ubu rero bafashe icyemezo cyo kuyabakuramo ku kibi n'icyiza bakwanga kuyatanga bakabafunga nk'uko n'ahandi hose ubu bimaze kuba umuco ko bagomba kuyatanga uyabuze agafungwa.

Tuzakomeza dukurikirane ibi bikorwa by'urukozasoni bya FPR n'ubwo ikomeza kubeshya isi yose ko ngo yateje imbere ubuvuzi n'ubuzima bw'abaturage ariko ntibyumvikana ukuntu FPY yivuga imyato ngo za mutiweri kandi abantu bagafungwa ngo kuko batazitanze kandi n'izo batanga ngo ntacyo zibamariye.

Ubwanditsi

http://www.umuvugizi.com/?p=7760

Turikiya igiye kuba indiri y'abicanyi bazajya bahiga abanyarwanda batavuga rumwe n'ubutegetsi bwa Kagame batuye mu bihugu by'i Burayi na Amerika

Kuba Kagame yagize ambasaderi Lt Gen Ceaser Kayizari mu gihugu cya Turikiya, birimo kutagira isoni n'icyo atinya kubera ko uyu Ceaser Kayizari ari kuri lisiti y'abicanyi bahitanye abihaye Imana b'aba Espanyoro, mu gihe kandi azi neza ko Turikiya imaze igihe isaba kwinjira mu muryango w'ibihugu by'Uburayi

Amakuru Umuvugizi ukura mu nzego z'ubutasi za perezida Kagame, yemezako Lt Gen Ceaser Kayizari yagizwe ambasaderi w'u Rwanda muri Turikiya kugirango azajye ayobora ibikorwa by'ubwicanyi bitandukanye bizajya bikorwa na maneko za Kagame, zitwikiriye umutaka w'aba diplomates.

Nyuma y'aho abakozi ba ambasade za Kagame zibarizwa mu burayi bananiriwe kwica abatavuga rumwe na we bahungiye kuri uyu mugabane ndetse n'uwa Amerika y'amajyaruguru kubera kubura uburyo, ibyo bihugu byagiye bikurikiranira hafi abo bicanyi ba Kagame, bamwe babarizwaga muri Suwede bakaba barahawe amasaha 24 kugirango babe bavuye ku butaka bw'icyo gihugu, undi mu bagaragayeho ibikorwa by'ubutasi akaba agifunze.

Minisiteri y'Ububanyi n'amahanga na polisi yo muri Suwede baherutse gushyira ahagaragara raporo yerekanaga ibikorwa by'ubutasi byakorwaga na ba maneko n'abasirikare bakuru ba Kagame, bashatse guhitana abatavuga rumwe n'ubutegetsi bwe inshuro nyinshi, ibyo bikorwa by'ubutasi bikaba byararanzwe n'ubuswa bukabije buvanze n'ubugome ndenga kamere, aho izo maneko za Kagame zashatse kwica impunzi z'abanyarwanda zahungiye mu gihugu cya Suwede ariko zikabinanirwa.

Mu gihugu cy'Ububiligi umwe muri maneko za Kagame yafatiwe ku mupaka w'Ubufaransa n'Ubwongereza, ubwo yageragezaga kwinjira muri icyo gihugu, agiye guhiga abatavuga rumwe na Leta ya Kagame, polisi y'Ubwongereza (Scotland Yard) ikaba yarahise imumenya imuta muri yombi ataragera ku butaka bw'iki gihugu, ari na bwo yasubizwaga mu Bubiligi igitaraganya. Icyo gihe polisi y'Ubwongereza ikaba yaraburiye abanyarwanda bafite ubwenegihugu bw'Ubwongereza, babarizwa mu mashyaka y'abatavuga rumwe na Kagame, ko bagombaga kwirinda, cyane cyane ko yari ifite amakuru ko bagombaga kwicwa n'inzego z'ubutasi za perezida Kagame.

Si ibyo gusa kuko na none inzego z'ubutasi n'iza gisirikare z'u Rwanda, mu myaka ishize, zaranzwe no kuvogera ubutaka bw'ibihugu byo mu burayi kugeza n'aho inzego z'umutekano z'Ubwongereza zihanangirije perezida Kagame, zimuha na za gihamya zerekanaga ibikorwa by'ubutasi byari byuzuyemo ubuswa n'agasuzuguro, iyi gasopo ikaba yaraviriyemo perezida Kagame gufata icyemezo, cyari kitamuturutseho, cyo kwirukana Col Dr Emmanuel Ndahiro ku buyobozi bw'urwego rukuru rushinzwe ubutasi bwo mu gihugu (NSS) kubera ikimwaro yari yatewe no gushaka kwicira abatavuga rumwe na we mu gihugu cy'Ubwongereza.

Nyuma yo kunanirwa kwica impunzi z'abanyarwanda zituye ku butaka bw'i Burayi na Amerika, Turikiya noneho ni yo igiye kugirwa indiri y'abicanyi ba Kagame.

Amakuru akomeje kugera ku Umuvugizi, aturuka mu nzego z'ubutasi za Kagame, akaba yemeza ko nyuma y'aho perezida Kagame ananiriwe kwicira abatavuga rumwe na we batuye ku butaka bw'Uburayi na Amerika ndetse na Canada, noneho agiye kubaka indiri y'abicanyi be muri Turikiya, aho bazajya bakoresha ambasade nk'icyicaro cyo kugaba ibitero ku mpunzi z'abanyarwanda zahungiye mu bihugu by'uburayi, Canada ndetse na Leta Zunze Ubumwe za Amerika, akaba ari na yo mpamvu perezida Kagame yagennye umusirikare we wo mu rwego rukuru nka Lt Gen Ceaser Kayizari, wanabaye umugaba mukuru w'ingabo zirwanira ku butaka, muri Turikiya akazaba yitwirikiriye umutaka wo kuba ambasaderi ariko mu by'ukuri akazi ke ka mbere akaba ari ako kuyobora ibikorwa by'ubwicanyi bizajya byibasira abatavuga rumwe n'ubutegetsi bwa Kagame.

Lt Gen Ceaser Kayizari agizwe ambasaderi muri Turikya mu gihe anaregwa ubwicanyi bw'aba Esipanyoro.

Kuba Kagame yagize ambasaderi Ceaser Kayizari mu gihugu cya Turikiya, birimo kutagira isoni n'icyo atinya kubera ko uyu Ceaser Kayizari ari kuri lisiti y'abicanyi bahitanye abihaye Imana b'aba Espanyoro, mu gihe kandi azi neza ko Turikiya imaze igihe isaba kwinjira mu muryango w'ibihugu by'Uburayi. Igihugu cya Turikiya kikaba cyagombye kwanga ko uyu mwicanyi wa Kagame wuzuye amaraso mu biganza yahagararira u Rwanda muri iki gihugu kubera ubwicanyi yagiye akorera abaturage, hakiyongeraho ko anaregwa ibyaha bikomeye byo kwisasira abihaye Imana babaga mu Rwanda, baturukaga mu gihugu cya Espagne.

Umwe mu bavuganye n'Umuvugizi, utarashatse ko dushyira amazina ye ahagaragara kubera impamvu z'umutekano we, yagize icyo adutangariza ku bijyanye n'uko perezida Kagame yagennye Lt Gen Ceaser Kayizari guhagarira u Rwanda muri Turikiya : "Byaba bibabaje Turikiya iramutse yemereye Lt Gen Ceaser Kayizari guhagararira u Rwanda muri icyo gihugu kandi azwiho kuba afite amaraso y'abaturage mu biganza bye, amaraso arimo n'ay'aba Esipanyoro, Turikiya ubwayo na yo ikaba irimo gusaba kwinjira mu muryango w'ibihugu by'Uburayi bigendera ku mahame yo kubahiriza uburenganzira bw'ikiremwamuntu no kwishyira ukizana kwa buri muntu".

Gasasira, Sweden

Inzara mu Rwanda-BBC Gahuza

http://www.bbc.co.uk/gahuza/mobile/amakuru/2012/10/121025_rdahunger.shtml

Ibirimo

Inzara mu Rwanda

25 Ukwa cumi, 2012 - 18:13 GMT

Icyegeranyo cy'umuryango Global Hunger Index cyo mu mwaka wa 2012 cyerekana u Rwanda nka kimwe mu bihugu bifite ikibazo cy'ingorane zo kubona ibyo kurya bihagije.

Abana bari munsi y'imyaka itanu bagera kuri 18% babarirwa mu bazingamye kubera indyo idahagije.

Icyegeranyo cya Global Hunger Index kije mu gihe ibiciro by'ibiribwa ku isoko mu Rwanda bikomeje kwiyongera. Bamwe mu baturage ariko bo bakavuga ko ubushobozi bugabanuka.

Uku niko henshi mu yandi masoko bimeze mu Rwanda. Ibiciro bitumbagira umunsi ku wundi kuri byinshi mu biribwa by'ibanze bikenerwa buri munsi n'umubare munini w'abaturage. Guhangana n'ikibazo cy'izamuka ry'ibiciro ku isoko ni nako ingorane z'amikoro mu ngo zigaragazwa na bamwe mu baturage.

Ikibazo cyo kubona ibiribwa bike kinakaze mu rubyiruko, ahanini rudafite akazi. Hari amemeza ko barya rimwe ku munsi kubera kubura ubusho0bozi.

Icyegeranyo cya Global Hunger Index cyerekana ibihugu biherereye munsi y'ubutayu bwa Sahara ku mugabane wa Afrika no muri Asiya nk'ibyugarijwe n'inzara cyangwa ingorane zo kubona ibyo kurya bihagije.

Imwe mu ngingo eshatu zagendeweho mu gutondeka ibihugu bifite ikibazo cy'inzara ni umubare w'abana bapfa batujuje imyaka itanu. U Rwanda rufite abagera ku 9%. Mu gihe abafatwa nk'abarya nabi bagera kuri 32%. Iyi mibare iri inyuma y'ibihugu nka Uganda, Kenya ndetse na Tanzaniya bituranye n'u Rwanda.

Rwanda : Bwana Nsabiyaremye Gratien, umuyobozi ushinzwe urubyiruko muri FDU-Inkingi, yatawe muri yombi

http://www.fdu-rwanda.com/RW/kinyarwanda-rwanda-bwana-nsabiyaremye-gratien-umuyobozi-ushinzwe-urubyiruko-muri-fdu-inkingi-yatawe-muri-yombi#more-2134

Rwanda : Bwana Nsabiyaremye Gratien, umuyobozi ushinzwe urubyiruko muri FDU-Inkingi, yatawe muri yombi

WERURWE 03, 2013  

Kigali Kuwa 3 Werurwe 2013

Rubavu : Bwana Nsabiyaremye Gratien umwe mu bayobozi  ba FDU-Inkingi ushinzwe  urubyiruko yatawe muri yombi muri icyi gitondo cyo kuwa 3 Werurwe 2013  ashinjwa guhungabanya umutekano w'igihugu no gususugura ubuyobozi.

Kuva ku mugoroba wejo tariki ya 2 Werurwe 2013 ahagana mu ma saa tatu z'ijoro urugo rwa Nsabiyaremye Garatien utuye mu murenge wa  Nyamyumba rwagoswe  n'abasirikare bitwaje imbunda bamusaba gukingura arabyanga kuko atumvaga ukuntu yaterwa n'abasirikare bitwikiye ijoro cyane cyane ko umwaka ushize mu kwezi kwa mbere 2012 nabwo yigeze guterwa n'abasirikare barwanira mu mazi bayobowe n'umukuru wabo Captaine RUTABURINGOGA agakubitwa akagirwa intere .

Abo basirikare baraye iwe kugeza bukeye ariko ubwinshi bwabo bwatumye abaturage bahurura baza gushungera maze ba basirikare bagira isoni barikubura barataha ariko bahamagara polisi ngo ize imutware. Polisi ihageze Gratien yemeye arakingura maze imutwara kuri sitasiyo(station) ya polisi ya Rubavu ubu akaba ariho afungiye.

Impamvu yiri tabwa muri yombi rifitanye isano n'ibyari bimaze iminsi itari mike kuko  guhera tariki ya 8 Ugushyingo 2012 inzego nkuru za FPR zamubwiraga ko ziba zoherejwe ziturutse i Kigali ku cyicaro gikuru cya FPR zahoraga zimusimburanwaho umunsi kuwundi haba aho yigisha ku rwunge rw'amashuri rwa Bumba ruri mu karera ka Rusizi, haba naho atuye asabwa  kuva muri FDU-Inkingi ngo akajya muri FPR Inkotanyi ariko we akababwira ko yumva adakwiye guhatirwa kujya muri FPR ku ngufu no kureka ibyo we yemera kandi ahererwa uburanganzira n'amategeko uRwanda rugenderaho. Tariki ya 28 Gashyantare 2013 nibwo izo ntore za FPR zaherukaga kumusanga aho yigisha zimubaza niba agitsimbaraye ku cyemezo cye azimbwira ko atigeze ahinduka maze bamubwira ko akwiye gutangira kwitekura kwirengera ingaruka agiye guhura nazo.

Ibi bikorwa byo kwibasira abatavugarumwe na leta ya Kigali bikaba bisa n'ibiri gufata indi ntera nyuma yaho Generali Pahuro Kagame  umuyobozi wa FPR Inkotanyi muri kongere nkuyu y'ishyaka FPR asabiye abacurabwenge baryo  gutangira kwitegura no gufata ibyemezo bikaze bigamije kuvanaho imbogamizi n'ibibazo ubu byugarije ishyaka rya FPR Inkotanyi.

FDU-Inkingi
Boniface Twagirimana
Umuyobozi wungirije w'agateganyo.

FDU-INKINGI-Graetien-03-03-13-RWA