Rwanda: Kwambura abaturage amafaranga ku ngufu birakomeje hirya no hino mu gihugu

http://rwanda-in-liberation.blogvie.com/

Kwambura abaturage amafaranga ku ngufu birakomeje hirya no hino mu gihugu byitwa ko ngo ari ugutanga mitiweri abatayatanze n'ababinenze bagashyirwa mu gihome

mars 3rd, 2013 by rwanda-in-liberation

Kumugoroba wo ku italiki ya 1 Werurwe 2013 umuyobozi w'akagali ka Higiro witwa Jean Baptiste Ndayishimiye, mu murenge wa Nyanza, akarere ka Gisagara, intara y'Amajyepfo yashyikirije abaturage benshi inzandiko zibahamagaza kwitaba ku biro by'akagali ka Higiro ngo icyo bahamagariwe bazakimenya bahageze. Mugitondo cyo ku italiki 2 Werurwe 2013 abahamagajwe bitabye maze bageze ku kagali barafungwa ngo kuko batatanze amafaranga ya mitiweri kandi iki gikorwa cy'ifatwa n'ifungwa cyabereye kumugaragaro abantu bose babireba n'ubwo hari ababashije kubaca mu rihumye bakigendera kuko abafunzwe bari benshi cyane.

Ubwo abafunzwe baje gutegekwa gusinya impapuro zivuga igihe bazatangira ayo mafaranga ariko nk'uko bari benshi cyane hari n'abatazisinye kuko byageze aho bikaba nk'akavuyo kandi ababasinyishaga bakaba babonaga basa n'abata igihe kuko byagaragaraga ko gusinya byasaga no kwikiza ko n'ubundi abaturage ayo mafaranga bashobora kutazayatanga kuko n'ubundi nta n'ubushobozi bafite bwo kuyabona kandi ngo ubukene buranuma.

Abayobozi b'akagali bamaze kubona ko bakora ubusa maze ahagana mu masaa kumi n'ebyiri z'umugoroba abafashwe bararekurwa kuko icyari kigamijwe ni ukubaka amafaranga ku ngufu ariko bisa n'ibyananiranye kuko bayabuze kubera ubukene bw'abaturage ntaho bashoboraga kuyakura.

Ibikorwa nk'ibi bikaba bikomeje kubera hirya no hino mu tugali hose mu Rwanda aho abategetsi bafata abaturage bakabafunga bakabaka amafaranga nk'aho ku italiki 18 Gashyantare 2013 mu ntara y'Uburasirazuba, akarere ka Nyagatare, umurenge wa Matimba, akagali ka Cyimbogo abaturage bagoswe na polisi n'inkeragutabara murucyerera maze babajyana ku biro by'akagali ka Cyimbogo umuyobozi w'ako kagali Butera Vincent ababwira ko bagomba kujya mu nama y'umuyobozi w'umurenge wa Matimba witwa Kubwa Ruboneka Sylvain. Bamaze kubagezayo basabye abafite mitiweri kwitandukanya n'abatayifite maze abatayifite bafungirwa mu mberabyombi y'akagali ababishoboye bagobokwa n'imiryango yabo abandi basinyira igihe bazayatangira.

Ku mataliki 18 na 22 Gashyantare 2013 nanone mu ntara y'Uburengerazuba, akarere ka Nyabihu, umurenge wa Jenda akagali ka Kareba abaturage barafashwe bazira ko ngo badafite mitiweri,

ko ngo batatanze amafaranga mu kigega agaciro, n'ibyo bita inyubako. Iryo fatwa n'ifungwa ryakozwe na Gashugi Théoneste, umuyobozi w'umurenge wa Jenda ukoresha  telefone  0788536965 afatanyije n'umukuru w'akagari ka Kareba witwa Gatsina Kaliwaboufite terefoni 0788631601 bari kumwe kandi muri iyo nama bakoresheje ahitwa mu Kareba. Inama yararangiye bose barabagota, bababwira ko batari buhave niba batanze amafaranga ya mitiweri, ay'agaciro n'ay'inyubako. Abashoboye kuyabona barayatanze, abandi basinyira igihe bazayatangira; abanze kuyasinyira barafungwa. Abantu banahigwaga mu ngo zabo bakajya kubafunga.

Mu Karere ka Rubavu Umurenge wa Kanama Akagali ka Mahoko murukerera rwo kuwa 26 Gashyantare 2013 habyukliye umukwabo wo guhiga abaturage badafite mitiweri bakaba barabafungiye kuri station ya Police ya Kanama aho bakorewe amadosiye ndetse bamwe barayatanga abandi barasinya bemeza ko bzayatanga banatanga n'igihe cyo kuyatanga. Biragaragara ko uyu ari umugambi muremure wa FPR wo gushakisha amafaranga mu baturage bayita aya mitiweri.

Ikibabaje kandi giteye amakenga ni uburyo abaturage bamburwa ibyabo ku ngufu bahatirwa gutanga amafaranga y'ubwisungane mu kwivuza ndetse rimwe na rimwe ibyabo bigashimutwa n'abayobozi bakoresheje inzego zitwa iz'umutekano. Mbese umuntu ahatirwa gute igikorwa kimufitiye akamaro we n'umuryango we niba koko babona ko bifite icyo bibamariye? Abaturage bamwe twavuganye badutangarije ko ngo basanga nta mpamvu yo kujya muri mitiweri kandi ngo n'ubundi kwa muganga ntacyo babamarira iyo bagiyeyo. Ngo keretse ufite umugore utwite niwe upfa kuyatanga nago abandi ngo birwanaho ariko leta ngo ntiyemerera umwe mubo mu muryango kwivuza kuri mitiweri mu gihe abagize umuryango bose bataratanga mitiweri.

Mu kumenya iki kibazo uko giteye twagiye ku mavuriro amwe n'amwe maze badutangariza ko ngo kuba bashinjwa gukora nabi ngo bifite inkomoko kuko ngo nta muti bakigirira mu mavuriro. Hamwe baratubwiye bati ese ubwo niba akarere katurimo umwenda wa mitiweri kahindukira kakajya kubabaza imikorere myiza? Bati mbese kuki batuvugaho imikorere mibi minisitiri w'ubuzima ntamanuke ngo aze kureba ibyo bibazo si ukubera ko bazi neza ko iyo mikorere mibi iterwa no kutagira ubushobozi? Bamwe mu baganga b'ibigo nderabuzima badutangarije ko paracetamol ariwo muti rukumbi basigaye bavuza abarwayi bose.

Ibi bibazo bya mitiweri biraturuka ku kuba abaturage nabo ubwabo amafaranga batanga ngo atinjira mu mavuriro ahubwo ngo ajya mu mirenge (Ikigo nderabuzima) no mu turere (Ibitaro) hanyuma abategeka imirenge n'uturere bakaba aribo bagenera amavuriro ibikoresho n'imiti. Kuba rero ayo mafaranga ubu ngo atangwa akigira mu bindi ngo nibyo bituma amavuriro akora nabi abaturage bakayaburira icyizere bakanga gutanga amafaeranga ya mitiweri none leta yafashe icyemezo cyo kuyabaka ku ngufu.

Ngibyo ibibazo bijyanye na mitiweri ubu bigaragara ko leta yahagurutse ikayaka ku ngufi igamije kwibonera udufaranga two guha abategetsi dore ko imfashanyo kuva zafungwa ubu guhemba abakozi bisigaye ari ikibazo cy'ingorabahizi kandi ngo kuba Ubwongereza hari ayo bwafunguye ngo ntacyo bizamara ku mari ya leta kuko azahita yoherezwa gufasha abakene atanyuze mu ntoki z'abategetsi ahubwo anyuze mu miryango ikorana n'abaturage.

Ubwanditsi  

CNR-Intwari: Imyanzuro y’inama isanzwe ya Biro Politiki

http://xa.yimg.com/kq/groups/6510735/455655350/name/Buruseri%201Mars%2Edoc

CNR - INTWARI Permanence: Rue Pré-Borvuvey 5 1920 Martigny, Suisse.     Tél:0041786522183 ; e-mail :genhabyarimana@cnr-intwari.com

Inteko y'Igihugu Iharanira Repubulika Site Web: www.cnr-intwari.com e-mail: secretariat@cnr-intwari.com information@cnr-intwari.com

 

                   

        Itangazo rigenewe Abanyarwanda n'Abanyamakuru

 

CNR Intwari yishimiye kugeza ku Banyarwandan'Abanyamakuru Imyanzuro y'inama isanzwey'igihembwe cya mbere ya Biro Politiki yayo yatereraniye i Buruseri ku itariki ya mbere Werurwe umwaka w'i 2013.

 

Iyobowe na Prezida wayo, Général Habyarimana Emmanuel, Inteko y'Igihugu iharanira Repubulika yatangiye inama ya Biro Politiki yayo isuzuma amaraporo atandukanye y'abayobozi b'amakomisiyo yose, n'abahagarariye CNR Intwari mu ma fasi yose y'imbere n'ayo hanze y'igihugu.

 

Inama ya Biro Politiki yasuzumanye kandi ubwitonzi n'ubushishozi inyandiko zitandukanye yagiye igezwaho n'abayoboke ba CNR Intwari b'imihanda yose y'isi.

 

Imaze kwumva no gusuzuma ayo maraporo yose Biro Politiki yasanze Igihugu cyacu kigeze ku manga nyuma y'umuteremuko utagira rutangira cyashyizweho n'ubutegetsi gito buri kuyogoza igihugu n'akarere k'ibiyaga bigari.

 

Yasanze imiyoboro yose iranga ub  uzima bw'igihugu yarashyizwemo ibihato k'uburyo igihugu kimaze kuba igihuru.Inzego zose z'ubutegetsi bugendera ku mahame ya demokrasi zambuwe abaturage zibumbira mu maboko y'agatsiko k'abantu bake bigize nk'Imana mu bantu.

 

Abaturage bambuwe uburenganzira ntavogerwa kumutungo wabo bwite, birukanwa mu byabo nta ngurane bahawe, bamburwa amasambu yabo, bategekwakwisenyera ku ngufu, bicishwa inzara, bakoreshwa uburetwa none bageze naho basabwa gusorera umutekano wabo, bikagaragaza rero ko leta iriho itagishoboye na busa kurangiza inshingano yayo nyamukuru yo kurinda umutekano w'abaturage.

 

Biro Politiki yasanze ko kuba umuntu ubwabyo bihagijekugirango uhabwe agaciro ka muntu bityo rero nta mpavu nimwe yasobanura ko umuturage agomba gusorera leta kugirango imuhe agaciro k'ubuzima bwe mu gihugu cye.

 

Kubera izi mpamvu zose n'izindi zitarondowe biro politikiya CNR-intwari yafashe ibyemezo bikurikira.

 

1. Kwegera abaturage kurushaho, kubatoza no kubamara ubwoba hakoreshejwe uburyo bwose bwo kwirwanaho mu gihe baba bahohotewe.

 

2. Yasabye Perezida wayo Général Habyarimana Emmanuel kubonana vuba n'abandi bakuru b'amashyaka atavuga rumwe n'ubutegetsi buriho mu Rwanda kugirango ababyiyemeje bafatanye na CNR -Intwari urugendo rwokwibohoza yiyemeje gutangiza vuba aha ifatanije n'abaturage bose b'uRwanda.

 

3. Gukomeza gukoresha inyandiko n'imvugo gusa, n'ubwo nabyo bikenewe cyane, ariko byonyine ntibihagije kugira ngo ubutegetsi bukoresha ubwicanyi, iterabwoba n'ikinyoma buve ku izima.

 

4. Urugendo rugiye gutangira ntawe ruheje.Abanyarwanda bose bifuza amahoro n'amajyambere birambye muRwanda basabwe kubigiramo uruhare kuko ari uburenganzira bwabo ntavogerwa bwo gushyiraho ubutegetsi bubabereye no kubuvanaho igihe butagishoboye inshingano zabwo.

 

Dufatane urunana maze twese twivane ku ngoyi.

 

 

Bikorewe i Buruseri ku itariki ya mbere Werurwe umwaka w'i 2013

 

 

Théobald Rwaka

 

Umuvugizi wa CNR Intwari.

 

 

Contact (media): 00 41 78 65 22 183

BBC Gahuza: Bwana CONDO GERVAIS arasubiza TONY BLAIR

BBC-Gahuza

Ibiganiro bya 16:30

Kuwa Kane, tariki ya 28 Gashyantare 2013.

http://www.bbc.co.uk/gahuza/audio_console.shtml?programme=glak1830

Tony Blair arahera ku umunota wa 16:15

Condo Gervais arahera ku umunota wa 21:49

Rwanda: Ubugizi bwa nabi bukomeje gukorerwa abaturage hirya no hino

http://rwanda-in-liberation.blogvie.com/

Ubugizi bwa nabi bukomeje gukorerwa abaturage hirya no hino kubera gushakishiriza Kagame amafaranga mu baturage mu gihe inkorsmutima ze nazo zikomeje kumuvuganira ngo asubizwe imfashanyo

février 28th, 2013 by rwanda-in-liberation

Mu Rwanda ikimaze iminsi kigaragara kandi kivugwa na benshi ni uburyo abaturage hirya no hino bakomeje guhohoterwa, bagakubirwa, bagafungwa, bakamburwa ibyabo ku ngufu ndetse bagakorerwa n'ibindi bibi babikorerwa n'intore za FPR n'imitwe yayo yose yaba iya gisirikari, iya gipolisi n'iyitwara gisirikari cyane cyane izwi ku izina rya local defences forces n'inkeragutabara bita reserve force mu cyongereza.

Iri hohoterwa ryo gukubitwa no gufungwa ndetse no kunyagwa ibyabo abaturage bagiye bahura nabyo aho bahatirwaga ngo gutanga amafaranga ya mutuelle, abandi ngo ni inyubako z'amashuri, iz'abarimu n'iz'abapolisi, ahandi ngo ni uguhemba inkeragutabara nab a gitifu, ndetse hari n'aho bababwiye ko umurenge (Kacyiru) ngo ufite ibibazo by'amafaranga none ngo uwafatwaga wese yagombaga kurekurwa atanze hagati ya bitatu na bitanu by'amanyarwanda. Ibi bikaba byarabaye taliki 23 Gashyantare 2013 aho abantu bafashwe ngo bazindukiye mu bindi bitari umuganda hanyuma barafungwa. Icyaje kugaragara gisekeje ni uko abari bafashwe ngo babonye ko abayobozi b'umurenge barubiye ngo barashaka amafaranga byanze bikunze maze batuma kubo mu miryango yabo basize hanze ngo iboherereze amafaranga mu materefoni yabo ibyo bita Tigo cash cyangwa MTN Mobile money. Ngo bamaraga kuyakira abayobozi b'umurenge bakabereka numero ya telephone bayoherezaho bakabona kurekurwa.

Biteye isoni n'agahinda kubona leta yishongoye ngo irishoboye bigatuma abayiteraga inkunga bifata none ikaba irimo gusahura abaturage duke bari batunze. Ubundi se nibamara kudusahura bakatumara bazabigenza gute? Iri hurizo niryo ririmo gutuma Kagame ashakishiriza kubura hasi no hejuru ngo abone aho yapfunda imitwe. Bikaba bivugwa ko umunyamabanga mukuru wa Loni Ban Ki Moon ngo yaba yaramusabiye gukomorerwa ndetse na Tony Blair akaba ubu ngo atakira atakiryama ngo arebe ko yazongera kwibonera 1/10 igihe Kagame yaramuka ashubijwe amafaranga n'ubwo adahakana uruhare rwa Kagame muri Kongo ariko ngo si we ukwiye guhanwa wenyine. Ibi bikaba bitakagombye kuvugwa n'umuntu nk'uriy wiyita inararibonye yirengagiza amaraso y'inzirakarengane yamenetse mu ntambara bakomeje gutera inkunga. Mbese ariya maraso azabazwa nde? Iriya facture izishyurwa na nde? Mbese Kagame asubizwe imfashanyo akomeze amarire ku icumu abanyarwanda n'abanyekongo ngo ni uko afite abazamuvuganira yambuwe imfashanyo akazisubizwa?

Uko bimeze kose abanyarwanda bakwiye guhaguruka bagatahiriza umugozi umwe cyane cyane ko bigaragara ko Kagame akomeje kongera kwisuganya yigira nyoni nyinshi, asinya amasezerano ya nyirarureshwa kandi atarigeze ahagarika kujya muri Kongo. Ikindi ni uko kuba abanyarwanda bakomeje kujujubywa n'ubutegetsi ari benshi byakagombye gutuma abatavuga rumwe na leta ya Kagame babona imbaraga zo kuyirwanya koko niba bafitiye impuhwe abaturage.

Ubwanditsi

http://umuseke.com/rubavu-afungiye-kwamagana-mutuel-de-sante/

Rubavu: arashinjwa kwamagana mutuel de santé

Hashize 1 day Iyi nkuru yanditswe. Yashyizweho kuwa 27/02/2013 . Yashyizwe ku rubuga na EDITOR   ·   Ibitekerezo 22

Maniragaba Robert afungiye kuri station ya Police ya Kanzenze mu karere ka Rubavu aho akurikiranyweho kwamagana gahunda ya Leta y'ubwisungane mu buzima aho yahamagariye abaturage kudatanga umusanzu w'ubu bwishingizi.

Maniragaba Robert mu maboko ya Polisi arasabwa kurenganurwa

Uyu musore wiga muri Kaminuza ya InKivu yo muri Congo Kinshasa mu mujyi wa Goma, kuwa kabiri tariki 26 Gashyantare yamaganye abakozi ba komisiyo yo gushishikariza abaturage gufata ubwishingizi mu buzima nkuko abiregwa n'ubuyobozi bw'Umurenge wa Kanama.

Ubwo abo bakozi bageraga mu kagari ka Kanyefurwe bashishikariza abaturage gutanga umusanzu w'ubwisungane, Maniragaba ngo yamaganye ibyo barimo abwira rubanda ko ibyo babwirwa ntacyo bimaze.

Uyu musore ngo yabwiraga abaturage ko badakwiye gufata mutuel ndetse ko bakwiye kumureberaho ntibayifate.

Ubuyobozi bw'Umurenge bumurega kandi kurwanya abakozi b'iyo komisiyo ubwo bageragezaga kumubuza kwamagana gahunda y'ubwisungane mu kwivuza.

Ibi bikaba ari  ibigaragara mu ibaruwa y'umunyamabanga nshingwabikorwa w'umurenge wa Kanama Sebikari Munyanganizi Jean.

Maniragaba Robert aganira n'Umuseke.com kuri station ya Polisi aho afungiye, yavuze ko ibyo bamurega abeshyrwa.

Yemeje ko ibyo yamaganye ari uburyo aboherejwe bakoreshaga babwira abaturage gutanga umusanzu w'uwbisungane mu kwivuza maze ngo bahera aho bamushinja ko yamaganye gahunda ya Leta.

Ati " njyewe nkwiye kurenganurwa kuko sinamagana mutuel kuko nzi ibyiza byayo, icyo napfuye n'abo bagabo ni uburyo bakagamo abaturage umusanzu wa mutuel."

Umwe mu baturage twaganiriye wari aho ubwo abo bakozi bashwanaga na Maniragaba, yadutangarije ko abo bakozi batse Maniragaba mutuel ye n'iz'abakozi be, maze ngo babona batangiye guterana amagambo.

Supt Mwiseneza Urbin umuvugizi wa Polisi mu ntara y'Iburengerazuba, yavuze ko bari gukurukirana ikibazo cya Maniragaba ngo bamenye neza ukuri kwabyo.

Supt Mwiseneza yatubwiye ko aboneraho kubeshyuza inkuru yaciye kuri Radio mpuzamahanga ya BBC ivuga ko Polisi yafunze abaturage badafite ubwisungane mu kwivuza ko ibyo bitabayeho.

Mutuel de santé, nubwo ari ingirakamaro kuri buri munyarwanda ariko ngo kuyifata ni uburenganzira ntabwo ari agahato ko ntawe polisi yafunga ngo ni uko nta mutuel agira.

Mu mirenge yose igize akarere ka Rubavu hashize icyumweru abayituye bakangurirwa gutanga ubwisungane mu kwivuza.

Maisha Patrick
UMUSEKE.COM

Rwanda: Noneho abatitwaje ikarita yo kwivuza n’abatarashoboye kuyigura basigaye bafatwa bagafungwa

http://www.umuvugizi.com/?p=7726

Agashya mu butegetsi bwa Kagame : Noneho abatitwaje ikarita yo kwivuza n'abatarashoboye kuyigura basigaye bafatwa bagafungwa

Polisi y'igihugu iherutse gufunga abaturage benshi bo mu cyahoze ari Gisenyi , ibakuye mu isoko rya Mahoko ibaziza gusa ko badafite amakarita yo kwivuza yitwa «mutuelle de santé»

Amakuru agera ku Umuvugizi yemeza ko ejo mu isoko rya Mahoko, ho mu Karere ka Rubavu, habaye umukwabu wakozwe na polisi y'igihugu, ibifashijwemo na Lokodifensi. Uyu mukwabu ngo wari ugamije guhigisha uruhindu abadafite amakarita yo kwivuza yitwa «mutuelle de santé» mu rurimi rw'igifaransa.

Abafashwe barimo abakecuru, abasaza, abagore n'abana, bari bibagiriwe mu rugo amakarita yabo, n'abandi batari barashoboye kuyagura kubera ko ikarita yo kwivuza mu Rwanda, yaguraga igihumbi kimwe cy'u Rwanda, ubu isigaye igura umugabo igasiba undi; igeze ku bihumbi bitatu by'u Rwanda. Aya mafaranga akaba adashobora kubonwa n'uwo ari we wese mu gihugu, cyane cyane ko mu rugo rugizwe wenda n'abantu icumi, buri wese agomba gutanga ayo mafaranga kugirango ashobore kwivuza igihe yarwaye.

Umwe mu baturage bo muri Mahoko bavuganye n'Umuvugizi, akaba atarashatse ko izina rye rishyirwa ahagaragara kubera impamvu z'umutekano we, yadutangarije ibyerekeranye n'iryo fatwa ry'abaturage bo mu Karere ka Rubavu : «Noneho ibyatubayeho byatuyobeye. Byenda kumera nk'ibyo muri 98 ubwo ingabo za FPR zazindukiraga muri iri soko rya Mahoko, zikica abantu batagira ingano, zibaziza ko ngo bari abacengezi. Icyo gihe zarashe umugenda abakecuru, abasaza, abana n'abagore b'intege nke, n'abari bahungiye mu buvumo bwa hano muri Kanama, zibasangayo, zibacucumiramo».

Undi wavuganye n'Umuvugizi uvuka muri ako karere k'Ubugoyi, na we yagize, ati : «Ibi ntitwari tubimenyereye ko abatitwaje ikarita ya «mutuelle de santé» bafatwa bagafungwa nk'aho ari ikindi cyaha bakoze. Ubundi ubutegetsi busanzwe buduhatira kwishyura iyi karita yo kwivuza, uyafite akayatanga ku bushake, utayafite akazaba ayashaka, kuko byari biri mu nyungu ze zo kwivuza igihe yarwaye. Kubihatirwa byari biriho, ariko byasaga nk'aho bitarimo agahato cyane nk'ako twabonye muri iki gitondo, ubwo Lokodifensi na polisi bari bashoreye abantu benshi kubera ko ngo nta «mutuelle» bari bitwaje».

Ikarita ya «mutuelle de santé», yatangiye igurishwa amafaranga igihumbi (1000) cy'amanyarwanda, ubu igeze kuri bitatu (3000) by'u Rwanda. Aya mafaranga kuyabona bisigaye bitorohera abaturage, kubera ko imiryango nyarwanda myinshi ibaho mu bukene bukabije. Aho abaturage benshi bakuraga agafaranga hari mu bihingwa byabo, ariko aho ubutegetsi bubahatiye guhinga ibyo bushaka, bitabazanira umusaruro nk'uwo bari basanganywe, barushijeho gukena ku buryo no kubona ibibatunga bihagije bisigaye ari ikindi kibazo. Umuturage wo muri aka Karere ka Rubavu, kari gasanzwe gakungahaye cyane ku gihingwa cy'ibirayi, na we yadutangarije ko «abenshi bahatuye batunzwe no kujya guca inshuro muri Kongo-Kinshasa, ihana imbibi n'icyahoze ari perefegitura ya Gisenyi».

Ikindi nuko, nubwo ubutegetsi bwa FPR buhatira buri wese gutunga iyi karita, abaturage bagaragaje ko ntacyo ibamariye kubera ko itabafasha kwivuza indwara zikomeye, zisaba imiti ihenze cyane. Ngo hari n'ubwo abagore bajya kubyara babura ayo kwishyura ibitaro bakabifungirwa mo kugeza bishyuye, n'ubwo iyo karita baba bayitwaje. Icyagaragaye ku bayivurizaho, ngo nuko ibafasha gusa kwisuzumisha ku mavuriro matoya no kubona imiti ya malariya, ibikomere byoroshye, inkorora, ariko indwara zikomeye nk'igituntu cy'igikatu, sida, iz'impiswi n'izo mu nda ndetse n'iz'ubuhumekero, abazirwaye iyi karita ikaba ngo ntacyo ibibafashaho.

Ikigaragarira buri muturage, ariko adatinyuka kugira icyo akivugaho kubera gutinya kwitwa umwanzi w'igihugu, kikaba ari uko ubutegetsi bwa FPR ari uburyo bw'inzira y'ubusamo bwabonye bwo gukama rubanda n'uduke rwari rufite, kuko niba u Rwanda rutuwe na miliyoni icumi z'abaturage, bashyirwaho agahato ko buri wese agomba gusora ibihumbi bitatu by'u Rwanda, bingana na miliyari 30 buri mezi atandatu, hakiyongeraho andi yiswe «Agaciro Development Fund», na yo abaturage bishyuzwa ku gahato, nta karengane karenze akongako.

Nibutse ko iyi karita ya «mutuelle de santé» imara amezi atandatu gusa ikaba icyuye igihe, nyuma y'aya mezi buri muturage akaba agomba kongera gutanga ibindi bihumbi bitatu kugirango ashobore kwivuza za ndwara zirimo malariya, inkorora n'ibicurane, n'ibikomere byoroshye bitarimo wenda nko kugongwa n'imodoka cyangwa izindi mpanuka zo mu mihanda.

N'ubwo buri munyarwanda asabwa kwishyura iyi karita ya «mutuelle de santé» kandi, ntibibuza na none ko abifite bigurira imiti, abatoni b'ubutegetsi bakishyurirwa amatike yo kujya kwivuza mu mahanga, bishyurirwa byose, mu gihe wa muturage mwene Ngofero ukamwa n'ayo atinjije, adafite uburenganzira bwo kwivuza no mu bitaro bikomeye byo mu gihugu nka «CHK» cyangwa «Roi Fayçal», akoresheje iyi karita y'ubwishingizi.

Amiel Nkuliza, Sweden.

http://www.bbc.co.uk/gahuza/amakuru/2013/02/130228_m23runiga.shtml

DRC: Runiga yakuwe ku buyobozi bwa M23

Ibiherutse kuvugururwa: 28 ukwa kabiri, 2013 - 14:14 GMT

• Facebook
• Twitter
• Send to a friend
• Print page

Umutwe urwanya ubutegetsi muri Repubulika Iharanira Demokarasi ya Congo, M23 wirukanye umuyobozi wa politike wawo, Jean Marie Runiga.

Mw'itangazo ryasohowe, uyu mutwe wa M23 urarega Runiga ubugambanyi.

Ngo yazanye amacakubiri mu ngabo zabo, azana General Bosco Ntaganda, uwo bise bwa mbere umwanzi wabo, mu gace bayobora, amuha amafaranga yo gushyira abantu mu gisirikare cye.

Jean Marie Runiga kandi bamurega kuba ataragaragaje ubushobozi bwo kuyobora umutwe wa M23.

M23 ivuga ko ibyo byose Jean Marie Runiga yabyiyemereye.

Ubu rero Jean Marie Runiga yasimbuwe by'agateganyo na Brigadier General Sultan Makenga warusanzwe amwungirije mu rwego rwa politike.

Ariko uruhande rushyigikiye Runiga ruravuga ko ahubwo Makenga ariwe wakuwe k'ubuyobozi bw'ingabo.

Ngo icyemezo cyo gukuraho Runiga, Makenga yagifashe wenyine.

Colonel Seraphin Mirindi uvuga ko ariwe muvugizi mushya w'umutwe wa M23 avuga ko barega General Makenga kutayobora neza ingabo no kunyuruza umutungo w'umutwe wabo.

Colonel Mirindi kandi avuga ko Makenga bamurega kugirana amasezerano na leta ya Congo atagishije abandi inama.