Tanzania : Leta irotswa igitutu ngo isobanure uburyo ikoreshwa na FDLR na RNC
Author : Izuba Rirashe
1
129605/02/2014
Hezekiya Wenje ushinzwe imigenderanire mu ishyaka rya CHADEMA (Ifoto/Interineti)
Ishyaka riharanira Demokarasi n'Iterambere muri Tanzania (CHADEMA) ryamaze kugaragaza aho rihagaze mu kibazo cy'umubano ujegajega hagati y'u Rwanda na Tanzania. Rirasaba ko Leta ya Tanzaniya gushyira ahagaragara ukuri ku makuru amaze iminsi akwirakwizwa avuga ko isigaye ifitanye umubano wihariye na FDLR na RNC, imitwe irwanya Leta y'u Rwanda ikorera mu mahanga.
Inkuru yatangajwe n'urubuga rwa Tanzania Daima rwandikirwa muri Tanzania, kuri uyu wa 5 Gashyantare 2013, iravuga ko umuyobozi ushinzwe imigenderanire mu ishyaka rya "Chama Cha Demokrasia na Maendeleo (CHADEMA)" akaba n'Umudepite uhagarariye Akarere ka Nyamagana ko mu Ntara ya Mwanza mu Nteko Ishinga Amatageko, Hezekia Wenje, yabwiye abanyamakuru i Dar Es Salaam ko hari amakuru yatangajwe n'ikinyamakuru cyo mu Rwanda cya "News of Rwanda", avuga ko hari abatavuga rumwe na Leta y'u Rwanda bakiriwe i Dar Es Salaam bagakora icyiswe "inama idasanzwe" (kikao mahsusi).
Abo bantu barwanya Leta y'u Rwanda ngo bakoreye inama i Dar Es Salaam mu buryo ishyaka rya Chadema rivuga ko ritiyumvisha, ku buryo ririmo rirotsa Leta igitutu ngo ibatangeho ibisobanuro, ni Dr Theogene Rudasingwa na Condo Gervais bo muri Rwanda National Congress (RNC), n'abandi bayobozi bo mu nzego zo hejuru mu mutwe w'inyeshyamba za FDLR barimo Lt Col Wilson Irategeka na Col Hamadi.
Uyu muyobozi ushinzwe imigenderanire muri Chadema, Hezekia Wenje, yakomeje abwira itangazamakuru ko umutwe wa RNC wari uhagarariwe muri iyo nama n'umuhuzabikorwa wawo Dr Theogene Rudasingwa ndetse na Condo Gervais, hanyuma ku rundi ruhande ngo FDLR ikaba yari ihagarariwe n'umuyobozi mukuru ushinzwe ibikorwa Lt Col Wilson Irategeka ndetse na Col Hamadi.
News of Rwanda: RNC, FDLR Holding Talks At President Kikwete Residence
Hezekia Wenje yakomeje yibutsa ibitangazamakuru byo muri Tanzania ko mu cyumweru kimwe cyabanjirije iyi nkuru ya News Of Rwanda, iki kinyamakuru cya News of Rwanda cyari cyanavuze ko Faustin Twagiramungu wigeze kuba Minisitiri w'Intebe ubu akaba ayobora ishyaka rya RDI-Rwanda Nziza naryo ritemewe mu Rwanda, yageze muri Tanzania tariki 19 Mutarama 2014, mbere y'uko yerekeza i Lyon mu Bufaransa.
Ubwo yageraga i Lyon akubutse muri Tanzania, Faustin Twagiramungu, ngo yamenyesheje abahagarariye ishyaka rye ko noneho ubu bafite ububasha bwo bwo kuba bahirika Leta iriho mu Rwanda bakoresheje imbunda.
Nk'uko inkuru ya Freemedia.co.tz ikomeza ibivuga, Wenje yibukije ko nanone ku itariki 20 Ukuboza 2013, ikinyamakuru News of Rwanda cyari cyasohoye indi nkuru ivuga uburyo Lt Col Wilson Irategeka na Col Hamadi bo muri FDLR, bahagurutse muri Tanzania berekeza muri Mozambique bakoresheje impapuro z'inzira za Tanzania, bikaba bivugwa ko bakoresheje izo mpapuro za Tanzania bagiye muri Mozambique kugirana ibiganiro n'abacanshuro (mamluki) ba RNC.
Gishingiye kuri ayo makuru ya News of Rwanda, Ishyaka rya CHADEMA (ni ryo shyaka rikomeye kurusha andi yose mu yatavuga rumwe n'ubutegetsi muri Tanzania), ryasabye Leta gukora ubugenzuzi kuri ayo makuru, cyane cyane ajyanye n'uburyo Tanzania yaba yarahaye impapuro z'inzira abarwanyi ba FDLR, kugira ngo izina rya Tanzania ridakoreshwa mu mabi yo gutanga ubufasha ku bantu bashaka guhirika ubuyobozi Abanyarwanda bitoreye.
Icya kabiri, CHADEMA yasabye Inteko Ishinga Amategeko binyuze muri Komisiyo y'Ububanyi n'Amahanga iyobowe na Depite Edward Lowassa, gushyiraho agakomisiyo gato gashinzwe gukurikirana igitotsi kiri mu mubano w'u Rwanda na Tanzania, hagamijwe ko ukuri kumenyekana kandi icyo gitotsi kikavamo kugira ngo hato bitagira izindi nkurikizi mbi kuri ibi bihugu bihuriye mu Muryango w'Afurika y'Iburasirazuba.
Chadema yanasabye ko imenyeshwa niba koko hari abayobozi bakuru muri Leta ya Tanzania baba baragize uruhare mu itangwa ry'ibyangombwa by'inzira byahawe abo bayobozi ba FDLR, ku mpamvu zabo cyangwa se ku itegeko baba barahawe na kanaka. Aha CHADEMA ishimangira ko niba koko byarakozwe byaba ari ikibazo gikomeye mu masezerano mpuzamahanga, kuko bitemewe ko umuturage utari uwa Tanzania ahabwa bene ibyo byangombwa by'inzira na Tanzania.
Icya gatatu, Chadema irasaba ko Leta ya Tanzania isaba Twagiramungu gusobanura neza niba koko yarageze muri Tanzania, avuge icyo yari aje gukora n'icyo yari agambiriye mu gutangaza ko yitabiriye inama idasanzwe muri Tanzania kuko byatumye umubano hagati y'ibihugu byombi (u Rwanda na Tanzania) ugenda biguru ntege.
N'ubwo bimeze gutyo ariko, iri shyaka rya CHADEMA riranashaka ko ku rundi ruhande Leta ya Tanzania yasaba Twagiramungu kuvuguruza ibyo bintu yavuze, agasaba imbabazi Abanyatanzania kuko yangirije umubano hagati y'igihugu cyabo n'u Rwanda, ndetse akanangiza isura y'igihugu cyabo kuko yatumye gifatwa nk'igitera inkunga inyeshyamba, ibintu bitemewe mu masezerano ya Afurika.
Twitter: @IzubaRirashe
No comments:
Post a Comment
Note: only a member of this blog may post a comment.