Minisitiri w'Intebe arahagararira u Rwanda mu gusezera kuri Mandela

Yanditswe kuya 10-12-2013 - Saa 10:18' na Jean Claude Ntawitonda

Minisitiri w'Intebe Dr Pierre Damien Habumuremyi arahagararira Prezida wa Repubuluka y'u Rwanda n'Abanyarwanda bose mu muhango wo gusezera kuri nyakwigendera Nelson Mandera muri Afurika y'Epfo ahategerejwe ibihangange n'abakuru b'ibihugu bagera kuri 90 baturutse ku isi hose.

Kuri twitter ya Minisiteri y'Intebe (Primature), Minisitiri w'Intebe yagize ati " Uyu munsi Minisitiri w'Intebe @HabumuremyiP arahagararira Pres. #Kagame n'Abanyarwanda bose mu muhango wo gusezera #NelsonMandela #Rwanda."

Nk'uko tubikesha Ibiro Ntaramakuru by'Abongereza Reuters, uhereye kuri Perezida wa Leta Zunze Ubumwe za Amerika Barack Obama, ukageza kuri perezida wa Iran Hassan Rohan baraba bateraniye muri sitade ya Soccer City Stadium yo mu Mujyi wa Johannesburg mu muhango wo gusezera Nelson Madiba Mandela mbere y'uko ahyingurwa ku musozi avukaho wa Qunu ku cyumweru tariki ya 15 Ukuboza 2013.
Kugeza ubu umurambo we uracyari mu nyubako "Union Buildings" y'i Pretoria kugira ngo ubanze werekanwe mbere yo gushyingurwa.

Ibitangazamakuru mpuzamahanga biravuga ko nubwo ugutabaruka kw'Intwari Madiba byababaje Isi yose hari n'isomo rihambaye bisize byiyongera ku mateka ye kuko bigiye kuba umuhuza udasanzwe ku bihangange byinshi bitajyaga biteganya kuba byahurira hamwe.

Urugero rwagarutsweho ni urwa Perezida Obama wa Amerika na mugenzi we wa Iran Rohan ; abandi badakunda gushyikirana mu bya dipolomasi baba bari muri uyu muhango ni nka Francois Hollande n'uwo yasimbuye ku butegetsi mu Bufaransa Nicolas Sarkozy.