Urukiko rw’Arusha ntiruzafungwa Kabuga na bagenzi badafashwe

 

Mu ruzinduko abacamanza ba ICTR bagiriraga mu Rwanda, kuri uyu wa mbere ariki 4 Ugushyingo, 2013 batangaje ko biteguye gukomeza gufatanya n'ubutabera bw'u Rwanda  kugira ngo abakurikiranyweho ibyaha bya Jenoside baburanishwe.

Boubakar Jallow, Umushinjacyaha Mukuru wa ICTR

Igice cy'Urukiko Mpuzamahanga Rwashyiriweho u Rwanda, cyasigaye Arusha mu rwego rwo gukurikirana abakekwaho ibyaha bya jenoside yakorewe Abatutsi mu 1994.

ICTR ivuga ko abacamanza bazasigara bazakomeza gukorana n'u Rwanda kugira ngo imanza zose z'abataraburanishwa ibyaha bya jenoside zirangizwe.

Boubakar na bamwe mu bacamanza bari kumwe

Mu kiganiro n'abanyamakuru i Kigali, Umushinjacyaha Mukuru wa ICTR Boubakar Jallow  yavuze ko  Igice cy'urukiko cyasigaye kizakomeza gukurikirana abagishakishwa bakoze ibyaha bya jenoside n'ababikekwaho.

Mu bagishakishwa hari abagera ku icyenda aho batatu muri bo bazakurikiranwa n'igice cy'Urukiko rwa Arusha cyasigaye, abandi batandatu amadosiye yabo yoherejwe mu Rwanda n'ubwo batarafatwa.

Yagize ati "N'ubwo ayo madosiye yoherejwe mu Rwanda igice cy'urukiko cyasigaye kizakomeza gufasha u Rwanda mu kubakurikirana.

Simbona impamvu yatuma ICTR ifunga, iki gice gisigaye kizafunga abahigwa bagikomeza kwidegembya."

Batatu bahigwa bukware ni Felicien Kabuga, Protais Mpiranyi na Gen. Augustin bizimana.

U Rwanda rutangaza ko rwashyizeho uburyo bwo gukangurira abantu gutanga amakuru, nk'uko byatangajwe n'Umushinjacyaha Mukuru, Richard Muhumuza.

Gusa byakomeje guhwihwiswa ko aba uko ari batatu bari mu bihugu byegeranye n'u Rwanda, aho Kabuga bivugwa ko yihishe muri Kenya na ho Mpiranyi akaba ari muri Zimbabwe.

Abacamanza bari basuye u Rwanda bagiranye ikiganiro n'Umushinjacyaha Mukuru w'u Rwanda

Urukiko Mpuzamahanga rwashyiriweho u Rwanda ngo ruburanishe abakozi jenoside n'ibindi byaha by'intambara, rukorera Arusha muri Tanzania, biteganyijwe ko ruzasoza manda rwahawe mu 2014 ariko hari igice cyizasigara gikurikirana abantu icyenda batarafatwa n'ubu bashakishwa.

__._,_.___